Նիկողայոս Տեր-Ղևոնդյան
Նիկողայոս Տեր-Ղևոնդյան | |
---|---|
Ծնվել է | 1848 |
Ծննդավայր | Ելիզավետպոլ |
Մահացել է | 1920 |
Մահվան վայր | Թիֆլիս |
Ազգություն | հայ |
Կրթություն | Թիֆլիսի Ներսիսյան դպրոց |
Մասնագիտություն | մանկավարժ, մեթոդիստ |
Նիկողայոս Տեր-Ղևոնդյան (1848, Գանձակ, Թիֆլիսի նահանգ, Կովկասի փոխարքայություն, Ռուսական կայսրություն - 1920, Թիֆլիս, Վրաստանի Դեմոկրատական Հանրապետություն), հայ մանկավարժ, մեթոդիստ։
Կենսագրություն[խմբագրել | խմբագրել կոդը]
1857-1867 թվականներին սովորել է Թիֆլիսի Ներսիսյան դպրոցում։ Աշխատել է Վերին Ագուլիսի հայոց երկսեռ (1868-1671), Թիֆլիսի Գայանյան օրիորդաց (1872-1874), Մոզդոկի օրիորդաց (1874-1877), Երևանի թեմական (1878-1881) դպրոցներում որպես հայոց լեզվի և գրականության ուսուցիչ։
1882 թվականին տեղափոխվել է Թիֆլիս։ Տեր-Ղևոնդյանի գաղափարները ձևավորվել են Խաչատուր Աբովյանի, Ղազարոս Աղայանի, Միքայել Նալբանդյանի, Կ․ Ուշինսկու աշխատությունների ազդեցությամբ։ Հիմնականում զբաղվել է տարրական դասարաններում հայոց լեզվի ուսուցման, գրաճանաչության, ընթերցանության, ուղղագրության հարցերով։ Ձգտել է դպրոցի դեմոկրատացմանը և աշխարհաբարն ուսուցման լեզու դարձնելուն։ Կազմել է «Մայրենի լեզու» ընթերցարանների շարքը (I–IV դասարաններ)։ Առաջին դասագիրքը՝ «Այբբենարան»-ը (հրատարակվել է 1871 թվականին), մինչև 1912 թվականը վերահրատարակվել է 35 անգամ։ Տեր-Ղևոնդյանի գրչին են պատկանում նաև «Մայրենի լեզվի քերականության տարերքը» (1883), «Բացատրություն մայրենի լեզվի» (ձեռնարկ ծնողների և ուսուցիչների համար, 1878), «Արփիկ» (1910) ուսումնական ձեռնարկները։ Նրա դասագրքերը օգտագործվել են նաև արևմտահայ դպրոցներում։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 11, էջ 674)։ |