«Տուն լճի մոտ» (անգլ.՝ The Lake House), արգենտինացի ռեժիսոր Ալեխանդրո Ագրեստիի ֆանտաստիկ մելոդրաման, որ նկարահանվել է 2006 թվականին։ Ֆիլմը հարավկորեական «Տուն ծովի մոտ» ֆիլմի ռեմեյքն է և Ագրեստիի՝ հոլիվուդյան առաջին ֆիլմը։ 1994 թվականին Սանդրա Բուլոկն ու Կիանու Ռիվզը միասին նկարահանվել էին «Արագություն» ֆիլմում։
2006 թվականին Քեյթ Ֆորսթերը (Սանդրա Բուլոկ) փեսացուից (Դիլան Ուոլշ) բաժանվելուց հետո որոշում է թողնել լճափի տունն ու տեղափոխվել Չիկագո, որպեսզի մոտ լինի իր նոր աշխատատեղին։ Քեյթը փոստարկղում նամակ է թողնում տան հաջորդ բնակչին՝ ներողություն խնդրելով շան թաթերի՝ կամրջակի վրա մնացած հետքերի ու ձեղնահարկում մնացած փոշոտ արկղի համար։ Նամակը գտնում է Ալեքս Ուայլերը (Կիանու Ռիվզ), որը միայնակ ճարտարապետ է։ Ալեքսը չի հասկանում՝ ինչի մասին է գրված նամակում, քանզի չկային ոչ կամրջակի վրայի հետքերը, ոչ էլ ձեղնահարկի փոշոտ արկղը։ Հանկարծակի հայտնվում է մի շուն ու կամրջակի վրա թողնում սև ներկի հետքեր, որով Ալեքսը նոր ներկել էր ցանկապատը։ Ալեքսը նամակ է թողնում նույն փոստարկղում, և շուտով պարզվում է, որ նրանց բաժանում է երկու տարվա ժամանակ, թեև գտնվում են նույն վայրում։
Կինոնկարի աշխատանքային վերնագիրը երկար ժամանակ եղել է «Il Mare»: Ֆիլմում իտալերեն այդ բառը, որ նշանակում է «ծով», օգտագործվել է որպես այն ռեստորանի անվանում, որտեղ Ալեքսը ժամադրում է Քեյթին երկու տարի հետո։